AQSH prezidenti Jo Bayden maʼmuriyati global kibertahdidlarni bartaraf etishga qaratilgan keng qamrovli xalqaro hamkorlik strategiyasini eʼlon qilmoqda. Politico nashrining xabar berishicha, bu tashabbus Birlashgan Millatlar Tashkilotida kiber meʼyorlarni shakllantirish va Xitoyning kibermakondagi taʼsiriga qarshi kurashishga qaratilgan.
AQSH Davlat kotibi Entoni Blinkenning soʻzlariga koʻra, strategiya toʻrtta muhim yoʻnalishga ustuvor ahamiyat beradi:
1) xavfsiz raqamli muhitni qoʻllab-quvvatlash;
2) ittifoqchilar bilan birga raqamli huquqlarni himoya qilish;
3) kiberhujumlarga qarshi kurashish;
4) hamkor davlatlarning xakerlar hujumiga chidamliligini oshirish.
Ushbu saʼy-harakatlarni kuchaytirish uchun AQSH Davlat departamenti federal resurslardan 50 million dollar ajratilgan Kibermakon va raqamli ulanish jamgʻarmasini tashkil etish niyatida. Ushbu jamgʻarma ittifoqdosh davlatlarga kiberxavfsizlik salohiyatini oshirishda yordam beradi.
Shuningdek, manbada aytilishicha, AQSH BMT doirasida kiber diplomatiyadagi ishtirokini kuchaytirishni maqsad qilgan. Jo Bayden boshchiligida ushbu xalqaro kiberxavfsizlik strategiyasini ishlab chiqish, ayniqsa, boʻlajak prezidentlik saylovlari arafasida jamoatchilik ishonchini oshirishga qaratilgan kengroq strategiyaning bir qismi boʻlishi mumkin.
