Oʻzbekiston Respublikasi Prezidenti Shavkat Mirziyoyev 1-aprel kuni joriy yilning yanvar oyida oʻtgan oliy darajadagi uchrashuvdagi kelishuvlar doirasida mamlakatimizga kelgan Xitoy Xalq Respublikasi Davlat kengashi aʼzosi, jamoat xavfsizligi vaziri Van Syaoxun boshchiligidagi delegatsiyani qabul qildi.
Yuqori martabali mehmon Oʻzbekiston yetakchisiga koʻrsatilayotgan mehmondoʻstlik uchun chuqur minnatdorlik bildirib, Xitoy Xalq Respublikasi Raisi Si Szinpinning salomi va eng ezgu tilaklarini yetkazdi.
Uchrashuvda xavfsizlikka nisbatan zamonaviy xatar va tahdidlarga qarshi kurashishda amaliy hamkorlikni yanada kengaytirish va birgalikdagi saʼy-harakatlarni muvofiqlashtirish masalalari koʻrib chiqildi.
Davlatimiz rahbari Oʻzbekiston bilan Xitoy oʻrtasidagi doʻstlik va barcha sharoitlarda strategik sheriklik munosabatlari bugun yuksak darajaga koʻtarilganini alohida mamnuniyat bilan taʼkidladi. Huquqni muhofaza qilish sohasida samarali idoralararo hamkorlik uchun mavjud salohiyat va imkoniyatlar qayd etildi.
Ustuvor yoʻnalishlar sifatida jamoat xavfsizligining asosiy yoʻnalishlari boʻyicha tajriba almashish va qoʻshma tadbirlar oʻtkazish, zamonaviy axborot texnologiyalari va innovatsion usullarni joriy qilish, kiberjinoyatchilikka qarshi kurashish, malakali mutaxassislarni tayyorlash va boshqalar koʻrsatib oʻtildi.
Mintaqaviy hamkorlik masalalari yuzasidan ham fikr almashildi.
