Ijtimoiy tarmoqlarda yuzlab qoʻy jasadlari yuk mashinasidan chuqurlikka toʻkib ketilayotgani aks etgan videolar tarqaldi. Ekologiya, atrof-muhitni muhofaza qilish va iqlim oʻzgarishi Surxondaryo viloyati boshqarmasi holat yuzasidan rasmiy maʼlumot berdi.
Unga koʻra, mazkur holat Surxondaryo viloyatining Sherobod tumanida sodir boʻlgan. Joriy yilning 29-30-aprel va 1-may kunlari yogʻingarchilik koʻp boʻlishi oqibatida tumanning «Bogʻiobod» mahallasi hududiga kuchli sel kelgan. Mahalladagi qishloqqa adirlikdan yoʻnalgan kuchli suv oqimi qoʻradagi 360 bosh qoʻyni nobud qilgan.
Aniqlik kiritilishicha, turli muhokamalarga sabab boʻlgan videoda ushbu hudud viloyat Favqulodda vaziyatlar boshqarmasi va Sanitariya-epidemiologiya boshqarmasi tomonidan nazoratga olinib, jasadlardan har xil kasalliklar tarqamasligi uchun dezinfeksiya qilinib koʻmish uchun olib ketish jarayoni tasvirlangan.
