Yevropa Ittifoqi (YI) davlatlarining Falastin — Isroil mojarosi boʻyicha pozitsiyalari sezilarli darajada farq qiladi. Bu kabi kelishmovchiliklar bir ovozdan qaror qabul qilishga majbur boʻlgan YIning imkoniyatlari cheklanganligini koʻrsatadi. Ushbu fikrlarni Yevropa Ittifoqining tashqi ishlar va xavfsizlik siyosati boʻyicha Oliy vakili Jozep Borrel aytib oʻtdi.
«Yevropa Ittifoqining kuchi uning birligida. Afsuski, yevropaliklar bu masalada aniq va chuqur farqlarni koʻrsatdilar», — deydi u Fransiyaning «Monde» gazetasiga bergan intervyusida.
Yevropa diplomatiyasi rahbari Falastin — Isroil mojarosi boʻyicha oʻz pozitsiyasini oʻzgartirgan va endi zudlik bilan oʻt ochishni toʻxtatishga chaqirayotgan Fransiyani misol qilib keltirdi. Boshqa davlatlar esa «bu Isroilga oʻzini himoya qilishga imkon bermaydi», deya hisoblamoqda.
Gʻazo sektoridagi vaziyat 2023-yilning 7-oktyabr kuni keskinlashdi. Bunga Falastinning HAMAS harakatining harbiy qanoti tomonidan eʼlon qilingan «Al-Aqso toʻfoni» operatsiyasi doirasida Isroil hududiga yuzlab raketalar uchirgani va yahudiy davlati hududiga bostirib kirib, 200 dan ortiq odamni garovga olgani sabab boʻldi. Ushbu hujum oqibatida 1,2 ming kishi halok boʻlgan, 5 mingdan ortiq odam jarohat olgan.
Bunga javoban Isroil mudofaa kuchlari Gʻazo sektorida HAMASga qarshi «Temir qilichlar» operatsiyasini boshladi. Bir necha kun ichida isroillik harbiylar Gʻazo bilan chegara yaqinidagi barcha aholi punktlarini nazorat ostiga oldi va chiziqdagi nishonlarga, jumladan, tinch aholiga havo hujumlarini boshladi. Oʻtgan yilning oktyabr oyining oxirida Isroilning anklavdagi operatsiyasining quruqlik bosqichi boshlandi.
Maʼlumotlariga koʻra, 2023-yilning 7-oktyabridan beri Isroilning hujumlari oqibatida Gʻazoda 33 mingdan ortiq odam halok boʻlgan, 76 mingdan koʻp odam jarohatlangan.
