Rossiya kuchlarining Qora dengizdagi port shaharga zarbalari tinmayapti.
Odessa viloyati gubernatori Oleg Kiperning maʼlum qilishicha, Rossiya tomonidan pochta omboriga uyushtirilgan ballistik raketa zarbasi oqibatida katta yongʻin chiqib, 14 kishi jarohatlangan. Bu Qora dengizda joylashgan port shaharga oxirgi kunlardagi uchinchi hujum boʻldi.
Rossiya raketalari tomonidan Sharqiy Doneskdagi Maryinka frontidan 12 kilometr uzoqlikda joylashgan Xirnik shahriga berilgan zarbalar oqibatida kamida ikki kishi vafot etib, olti nafar inson yaralandi. Shuningdek, xavf ostida qolayotgan, dushman chegarasidan 13 kilometr uzoqlikdagi Xarkov viloyatidagi Zolochiv shahriga bomba otilgan. Ushbu hujum ikki kishining halok boʻlishi va 13 nafar insonning yaralanishiga olib keldi.
Ukrainaning sharqiy strategik tayanchi hisoblanmish Chasov Yarni himoya qilayotgan qoʻshinlarda oʻq-dorilar, jumladan, artilleriya snaryadlari yetishmasligi kuzatilmoqda. Bunga sabab Rossiya tomonidan doimiy zarbalarning tinmayotganidir.
«Associated Press» axborot agentligi tomonidan olingan yangi dron tasvirlari rus qoʻshinlarining tinimsiz artilleriya zarbalari Chasov Yarni qanday vayron qilganini koʻrsatadi. Oldin shaharchada 12 ming kishi istiqomat qilgan. Ammo hozir hudud odamlarsiz huvullab qolgan.
Ukrainaning uchuvchisiz samolyot hujumlari markaziy Orel va janubiy Kursk viloyatlaridagi qishloqlarda elektr energiyasining uzilishiga sabab boʻldi. Shuningdek, Ukraina qurollari Moskvadan 190 km janubi-sharqda joylashgan Ryazandagi Rossiya neftni qayta ishlash zavodiga urilgan.
Yangi sanksiyalar
AQSH Rossiyaning Ukrainadagi urushi sababli 300 ga yaqin kompaniyaga nisbatan yangi sanksiyalarni eʼlon qildi. Moskva bu cheklovlarni Xitoy orqali chetlab oʻtishi sababli sanksiyalar Xitoy va Gonkongda joylashgan 20 ta kompaniyaga, jumladan, dronlarni ishlab chiqarishda foydalaniladigan buyumlarni eksport qilgan bir qancha tashkilotga nisbatan qaratilgan.
Oʻz navbatida, Rossiya mudofaa vaziri Sergey Shoygu Ukrainadagi urush uchun qurol ishlab chiqarishni koʻpaytirish va yetkazib berishni tezlatish haqida topshiriq berdi. Vazir Moskva Ukrainada Rossiya qoʻshinlari tomonidan qoʻlga olingan Gʻarb tanklari va harbiy texnikalarini namoyish qilib, Kiyev ittifoqchilari Rossiya hujumlarida toʻsqinlik qila olmasligini maʼlum qildi.
